CoronaVirusஇந்தியா

கொரோனாவால் கொல்லப்பட்ட மனிதநேயம் – மனிதநேயம் மரணித்துவிட்டது இந்த சம்பவத்தால்

உலகில் பல நாடுகளை தன்னுடைய கோரப்பிடியில் அச்சத்தில் வைத்திருக்கும் கொரோனா வைரஸ் மனிதர்களை மட்டுமே அல்லாமல், மனிதர்களிடமிருக்கும் மனித நேயத்தையும் படுகொலை செய்துள்ளது என்பதற்கு எடுத்துக்காட்டான சம்பவம் தெலங்கானா மாநிலத்தில் காமாரெட்டி மாவட்டத்தில் நடைபெற்றுள்ளது…!

காமாரெட்டி நகரில் இருக்கும் ரயில் நிலையத்தில் கூலி தொழிலாளியாக வேலைசெய்து தனியாக வசித்து வந்தவர் வெங்கடராஜு. ஊரடங்கு உத்தரவு காரணமாக ரயில் போக்குவரத்து நிறுத்தப்பட்டுள்ள நிலையில் கூலி கிடைக்காமல் திண்டாடிய வெங்கடராஜூ, அந்தப் பகுதியில் வசிக்கும் பொதுமக்கள் கொடுக்கும் உணவை வாங்கி சாப்பிட்டு அங்கேயே இருந்தார். வயது மூப்பு, போதிய உணவின்மை ஆகிய காரணங்களால், வழக்கமாக சாலையோரத்தில் படுத்து தூங்கும் வெங்கட ராஜு அதே சாலையோரத்தில் மரணமடைந்தார்.

சாலையோரத்தில் வெங்கட ராஜூ மரணமடைந்து கிடைப்பது பற்றிய தகவல் அறிந்த காமாரெட்டி போலீசார், அங்கு சென்று அவருடைய உடலை அரசு மருத்துவமனைக்கு கொண்டு செல்ல முயன்றனர். ஆம்புலன்ஸ் கிடைக்காத காரணத்தால் வெங்கட ராஜூ உடலை மருத்துவமனைக்கு கொண்டு செல்ல இயலாமல் போனது. தனியார் வாகனம் மூலம் வெங்கட ராஜூ உடலை மருத்துவமனைக்கு கொண்டு செல்ல போலீசார் எடுத்த முயற்சிக்கும் கொரோனா அச்சம் காரணமாக பலன் கிடைக்கவில்லை.

எனவே வேறு வழி இல்லாத நிலையில், ரயில்களில் மரணம் அடையும் ஆதரவற்ற நபர்களின் உடல்களை எடுத்துச் சென்று அடக்கம் செய்யும் ராஜூ என்பவரின் உதவியை போலீசார் நாடினர். போலீசாருக்கு உதவி செய்யும் வகையில் அங்கு வந்து சேர்ந்த ராஜு, வெங்கட ராஜூ உடலை துணியில் சுற்றி சைக்கிளில் வைத்து மருத்துவமனைக்கு கொண்டு சென்றார்.

கொரோனா வைரஸ் மனிதர்களை மரணிக்கச் செய்யும் நிலையில், கொரோனா வைரஸ் காரணமாக மனிதர்களிடையே ஏற்பட்டுள்ள அச்சம் மனிதநேயத்தையும் மரணிக்கச் செய்துவிட்டது என்பதற்கு இந்தச் சம்பவம் எடுத்துக்காட்டாக அமைந்துள்ளது.

Related Articles

Back to top button